Diserat ku Achiel Syam

Dina Lapak
Fiksimini Basa Sunda

Facebook photo

Fikmin # Bubur Sumsum Kuah Durian Upik #

Wanci tangagé. Srangéngé maku panas na ubun-ubun. Hanaang nyekék tikoro. Ngécagkeun sésa panggulan tiwu. Cingogo émpér toko. Ngusiwel, ngéntépan lambaran ladang jualan. Patdalapan réwu. Diitung kerung, dipotong setoran nu boga tiwu. Kapimilik lapanlas réwu. “Alhamdulillah, Ya Allah! Bekel bukaan Si Upik!” Duit disesebkeun na kopéah. Poé mingkin mentrang bayeungyang. Beungkeutan tiwu dipanggul. Ngingkig ngalér muru pasar.

“Untukku ‘Wak?” “Seikat besisa ‘Mir.” “Takpelah, tambah-tambah tuk soré!” Tiwu ditangtungkeun gigireun gorobak Amir, Tukang Air Tebu. Créng dibayar. “Makasih!” “Tak hendak dibungkus tuk anak?” “Tak payah, dieorang minta Bubur Sumsum kuah durian.” “Lawohnye punye pinta héhé…Kabulkanlah! Satunya anakmu!” “Insya Allah! Pamit Aku ‘Mir!” “Iye ‘Wak! Salamkan tuk anakmu!”

Mulang, mawa haté bungangang sapanjang lengkah. Leng! Pikiran ngalayang nyawang paroman budak. Kacipta marahmayna nampanan paméntana. Kacipta sugemana wanda mangsa buka, Bubur Sumsum kuah durian nu dipikameumeut, saban ngaliwat balik nganteurkeun hasil setrikaan indungna. Tiiit! Jedak! Bru! Téténjoan pinuh béntang baranang. Getih ngabayabah. Nyeri satulangsandi.

Iklan